Улууспутугар буолаары турар 8 Саха сирин спортивнай оонньууларын чэрчилэринэн, Саха автономиятын 100 сылыгар уонна нэһилиэкпитигэр Аҕа, эр киһи сылыгар аналлаах "Сыалы тап" коммерческай күрэх буолла. Күрэхтэһии үөрүүлээх аһыллыытыгар Саха көрдөрөр иһитиннэрэр хампаанньа тэрийэн ыыппыт "НВК Кубогын" иһин күрэххэ кыттыбыт Егоров Иван Гаврильевич, Лукин Семен Гаврильевич, Дорофеев Максим Николаевич нэһилиэкпит хамаандатын кыттыылаахтарыгар нэһилиэк баһылыга Савва Иванович Егоров махтал суруктары уонна бэлэхтэри үөрүүлээх быһыыга туттартаата.

Күрэххэ барыта 14 эр бэрдэ кытынна. Үс түһүмэҕинэн ол эбэтэр дартс быраҕыы, корзинаҕа мээчиги киллэриигэ Иннокентий Готовцев тэҥнээҕин булбата, икки көрүҥ кыайыылааҕа буолан атын кыттааччыларга балаһыанньаны уустугурта. Сыал ытыыга Николай Заболоцкай кыраҕы харахтааҕын көрдөрөн инники буолла. Уопсай түмүккэ күрэх муҥур кыайыылааҕынан Иннокентий Готовцев 3500солк. иккис миэстэҕэ Николай Заболоцкай 2000солк. үһүс миэстэҕэ Айаал Булдаков 1500 солк. наҕараадаланнылар. Кыайыылаахтар мэтээл кэттилэр, туоһу суруктары туттулар. Биирдиилээн көрүҥнэргэ бастаабыттар эмиэ харчынан бириэмийэ ыллылар. Биирдиилээн көрүҥнэргэ Тандатааҕы норуот айымньытын киинэ 1000 солк, олохтоох библиотека библиотекаря Егорова Эльвира Юрьевна 2000 солк. спонсордаатылар. Олус сэргэх сонун тэрээһин дьону сэргэни сэргэхситтэ.